“Марыя Захарэвіч з Нарачанскага края – вёскі Навасёлкі Мядзельскага раёна, якой Бог даў быць артысткай”, – так Марыя Георгіеўна прадставіла сябе ў адным з інтэрв’ю рэгіянальнай газеце.

Марыя Захарэвіч – адна з самых яркіх зорак беларускай нацыянальнай сцэны. Амаль за 70 гадоў творчай дзейнасці яна стварыла цэлую галерэю запамінальных жаночых вобразаў, якія складаюць залаты фонд айчыннага тэатральнага мастацтва. У Нацыянальным акадэмічным тэатры імя Янкі Купалы, дзе наша гераіня служыць больш чым 60 гадоў, яна сярод тых купалаўцаў, якія склалі гонар славутага калектыву, заваявалі шчырую любоў і велізарную ўдзячнасць некалькіх пакаленняў гледачоў.

Творчасць славутай зямлячкі адзначаны высокімі ўзнагародамі: Дзяржаўнай прэміяй, ордэнам Дружбы народаў, медалём Францыска Скарыны, медалём Роўнаапостальнага Кірылы Тураўскага, прызам Беларускага саюза тэатральных дзеячоў “Крыштальная Паўлінка – 2004”, прызам Беларускага саюза кінематаграфістаў “За адданасць кінамастацтву” і шмат іншымі. У 2012 г. Марыя Захарэвіч стала ганаровым грамадзянінам Мінскай вобласці, а ў 2014 – ганаровым грамадзянінам Мядзельскага раёна. Але для яе галоўная ўзнагарода – гэта любоў публікі.

Хочацца прывесці радкі з прызнання драматурга Аляксея Дударава: “Ёсць постаці, якія з цягам часу становяцца сімваламі, знакамі. Нечым асаблівым і непаўторным, тым, у чым код Часу, Жыцця, Сэнсу, Мастацтва… Прозвішчы гэтыя не патрабуюць тлумачэнняў. Іх досыць толькі назваць – і ўсё прыйдзе само па сабе. Бо ў гэтых сімвалах-прозвішчах нейкім чароўным чынам існуе год Любві, Таленту, Майстэрства”.

Пазнаёміць вас, паважаныя нашы чытачы,  з жыццём і творчасцю народнай артысткі БССР Марыі Захарэвіч, нашай таленавітай зямлячкай, – мэта данай працы.