О библиотеке
История библиотеки
У студзені 1940 года Указам Прэзідыума Вярхоўнага Савета БССР быў утвораны Мядзельскі раён. У хуткім часе пачала працаваць у райцэнтры і бібліятэка. На жаль, нам дакладна невядома дата заснавання бібліятэкі. Гэтыя звесткі не захаваліся ў абласным архіве, у які мы не раз звярталіся. Даты заснавання не ўдалося адшукаць і ў даваенных газетах, якія захоўваюцца ў Нацыянальнай бібліятэцы Беларусі. Адзінай крыніцай, якая падцвярджае існаванне бібліятэкі ў Мядзеле летам 1940 года, з’яўляецца артыкул М.Танка “У новым Мядзеле”, які быў змешчаны ў “Сялянскай газеце” ад 3 жніўня 1940 года: “Цяпер тут кіпіць новае совецкае жыццё. Мядзел стаў раённым цэнтрам. Растуць новыя дамы, адкрыта раённая бібліятэка, будуецца новы клуб…”. Таму дату 3 жніўня 1940 можна лічыць датай заснавання бібліятэкі.
Хаця, па ўспамінах старажылаў наша бібліятэка мае даволі даўнюю гісторыю. Яшчэ ў 1843 годзе, калі ў мястэчку Мядзел было заснавана двухкласнае вучылішча, пры ім пачала працаваць і бібліятэка, якая налічвала на той час 122 кнігі.
Былы карэнны мядзельчанін Іван Андрэевіч Будкевіч 1906 года нараджэння ўспамінаў бібліятэку, якая ў дваццатых гадах мінулага стагоддзя размяшчалася ў двух пакоях памяшкання валаснога Савета (зараз вул.Юбілейная, раён гандлёвага цэнтра). У бібліятэцы захоўваліся кнігі ў асноўным на польскай і часткова рускай мовах. Кнігі выдаваліся бясплатна. Папулярнасцю карысталіся творы Л.Талстога, М.Лермантава, Г.Сенкевіча, М.Канапніцкай і іншых аўтараў. Большую частку чытачоў бібліятэкі складала моладзь. Па ўспамінах І.А. Будкевіча моладзь у той час актыўна цягнулася да ведаў, імкнулася цікава і карысна арганізаваць свій вольны час, ставячы інсцэніраваныя пастаноўкі па прачытаных творах.
Побач з валасной у мястэчку дзейнічала і школьная бібліятэка. Чытаць у ёй мелі магчымасць не толькі вучні, але і ўсе жадаючыя.
Карэнны мядзельчанін Міхаіл Гершынавіч Гардон (1929 года нараджэння) успамінае, што ў 30-ых гадах ХХ стагоддзя (пры Польшчы) бібліятэка ў мястэчку Мядзел размяшчалася ў святліцы каля пастарунка (міліцыі). У гэтай бібліятэцы меліся кнігі, часопісы, збіралася моладзь. Хутчэй за ўсё бібліятэка працавала на грамадскіх пачатках.
У верасні 1939 года Мядзел і яго ваколіцы былі далучаны да Усходняй Беларусі. Максім Танк узгадвае: “Цяпер ва ўсіх сельсоветах раёна распачаліся курсы па ліквідацыі малапісьменнасці сярод дапрызыўнікаў. Арганізавана 92 чырвоныя куткі і 7 хат-чыталень”.
У канцы чэрвеня 1941 года Мядзел акупіравалі войскі фашысцкай Германіі. Бібліятэчны фонд быў разграблены, часткова спалены немцамі.
У хуткім часе пасля вызвалення Мядзела (4 ліпеня 1944 года) пачала адраджацца і раённая бібліятэка. Па сведчанню Міхаіла Гардона ў бібліятэцы на той час працавала Фэйга Гудкін. Пад бібліятэку было выдзелена памяшканне па вуліцы Крупскай (зараз д.№20).
У 1944-1946 гадах моладзь і камсамольцы аб’явілі рух па збору літаратуры для бібліятэкі. Некаторыя мясцовыя жыхары вярталі кнігі, якія былі ў фондах бібліятэкі яшчэ да вайны. Вучні Мядзельскай школы звярнуліся ў Чалябінскую бібліятэку з пісьмом, у якім прасілі выслаць кнігі. На іх просьбу адгукнуліся, і праз некаторы час у раённую бібліятэку прыйшла пасылка, у якой было 800 кніг.
У аддзеле культуры, створаным у маі 1945 года, захаваліся загады, згодна з якімі ў 1949 годзе ў раённай бібліятэцы працавалі Ганна Дзмітрыеўна Шурпялёва і Мальвіна Францаўна Магуцкая. У бібліятэцы захаваліся інвентарныя кнігі, запісы ў якіх пачалі весціся з 1947 года. Па стану на 1 студзеня 1948 года ў фондзе раённай бібліятэкі налічвалася 1358 экз. кніг.
У пасляваенны час бібліятэка памяняла сваё месцазнаходжанне. У памяшканні на вуліцы Крупскай было вырашана размясціць раённы фінансавы аддзел, абібліятэку для зручнасці чытачоў перавесці бліжэй да цэнтра ў памяшканне зямельнага аддзела (зараз вул. Крупскай, д.№3 )
Напрыканцы саракавых гадоў па вул. Савецкай, 6 быў пабудаваны драўляны будынак райкома камсамола. Некалькі пакояў было выдзелена пад раённую бібліятэку.
Пазней, там жа размясцілася і раённая дзіцячая бібліятэка, якая адкрылася 12 жніўня 1951 года. У гэтым будынку бібліятэкі існавалі да 1980 года. У 1982 годзе бібліятэка атрымала спецыяльна пабудаванае памяшканне па вуліцы Шаранговіча.
З 1 студзеня 1979 года згодна з рашэннем райвыканкама ад 15.03.1978г. №18-11 “Аб цэнтралізацыі сеткі дзяржаўных масавых бібліятэк раёна” раённая бібліятэка была рэарганізавана ў цэнтральную раённую, пры гэтым значна пашырыліся не толькі функцыі бібліятэкі, але і яе штатны расклад, утварыліся спецыяльныя аддзелы: абслугоўвання чытачоў, камплектавання, арганізацыі і выкарыстання бібліятэчных фондаў, методыка-бібліяграфічны. На цэнтральную бібліятэку была ўскладзена адказнасць за арганізацыю бібліятэчнага абслугоўвання насельніцтва раёна і за работу ўсёй цэнтралізаванай сістэмы, у якую на той час аб’ядналіся 63 бібліятэкі.
10 кастрычніка 1995 года Указам Прэзідэнта Рэспублікі Беларусь А.Р.Лукашэнкі раённай бібліятэцы прысвоена імя народнага паэта Беларусі, Героя Сацыялістычнай працы Максіма Танка.
З 1999 года пачалася аўтаматызацыя асноўных унутрыбібліятэчных працэсаў: камплектавання і ўліку фондаў, апрацоўкі і каталагізацыі. Пачаў фарміравацца электронны каталог, з’явілася ўласная друкаваная прадукцыя, аўтаматызаваныя базы дадзеных.
У 2002 годзе створаны публічны цэнтр прававой інфармацыі з набыццём адпаведнага эталоннага банка дадзеных і яго штодзённым абнаўленнем.
Цэнтральная бібліятэка атрымала выхад у Інтэрнэт, была наладжана работа электроннай пошты.
З 1 студзеня 2008 года ў чытальнай зале, а з 1 студзеня 2009 года на абанеменце абслугоўванне карыстальнікаў ажыццяўляецца ва аўтаматызаваным рэжыме.
Бібліятэка штогод абслугоўвае каля 2,5 тыс. карыстальнікаў. Сукупны інфармацыйны рэсурс складае 60 тысяч экзэмпляраў, акрамя кніг – звыш 80 назваў перыядычных выданняў.
З 2000 года пры бібліятэцы працуе клуб для пажылых людзей “Задушэўная размова”, у 2001 годзе пачаў працаваць клуб для старшакласнікаў “Абітурыент”.
У 2005 годдзе пры аддзеле бібліятэчнага маркетынгу створаны клуб дзелавых спецыялістаў “Прафесіянал” і клуб для маладых бібліятэкараў “Факультэт бібліятэчных ведаў”.
У бібліятэцы ладзяцца літаратурна-музычныя кампазіцыі, творчыя сустрэчы, тэматычныя вечары, тэатралізаваныя прадстаўленні, конкурсы, прэзентацыі і іншыя мерапрыемствы.
На базе бібліятэкі праводзяцца семінары, канферэнцыі, сустрэчы з калегамі па абмену вопытам
Адным з прыярытэтных накірункаў дзейнасці бібліятэкі з’яўляецца краязнаўства. Краязнаўчая інфармацыя захоўваецца ў 40 папках-дасье, якія пастаянна папаўняюцца.
Бібліятэка ганарыцца сваімі славутымі ўраджэнцамі: М.Танкам, М.Захарэвіч, В.Шаранговічам, П.Мядзёлка, Г.Шупенькам, А.Каўрусам, Л.Салавей, М.Шабовічам, Г.Бальчэўскай, М.Дуксам, І.Скурко, А.Варановічам, Я.Шабаном, М.Шаховічам, Н.Капай, А.Нафрановічам і інш.
Бібліятэка ушаноўвае тых, чый лёс звязаны з Мядзельшчынай: У.Дубоўку, А.Быкава, Р.Малахоўскага, П.Жукава, М.Маскевіча, І.Пракаповіча, С.Валодзьку. Неаднаразова гасцямі бібліятэкі былі вядомыя літаратары, артысты, кампазітары: Л.Дранько-Майсюк, Н.Гайда, І.Лучанок, І.Краснадубскі, Т.Кашчэва, Э.Акулін, С.Законнікаў, А.Пісьмяннкоў, В.Іпатава, К.Камейша, У.Ліпскі, С.Грахоўскі і інш.
Творчыя вечарыны, прэзентацыі, вечары памяці, сустрэчы з пісьменнікамі, абмеркаванні, выпуск буклетаў з нагоды юбілеяў – вось няпоўны пералік напрацовак з творчай скарбонкі бібліятэкі.
За гады сваёй гісторыі Мядзельская цэнтральная раённая бібліятэка неаднаразова адзначалася ўзнагародамі розных узроўняў. Вось толькі некаторыя з іх:
1985г. – Ганаровая грамата Упраўлення культуры, Мінскага аблвыканкама і абкама прафсаюза работнікаў культуры за высокія паказчыкі, дасягнутыя ў ходзе абласнога агляда-конкурса работы бібліятэк “Дасягненні навукі і перадавой практыкі ў вытворчасці.”
1992г. – Дыплом пераможцы Рэспубліканскага агляда-конкурса “Бібліятэка – асяродак нацыянальнай культуры”.
2002г. – Дыплом Упраўлення культуры Мінаблвыканкама ІІ ступені пераможцы агляда-конкурса на лепшую арганізацыю бібліятэчнай прасторы “Бібліятэчны інтэр’ер” у намінацыі “Лепшая цэнтральная бібліятэка”.
2003г. – Дыплом Мінскай абласной бібліятэкі імя А.С.Пушкіна “Пераможца спаборніцтва на лепшую пастаноўку работы ў 2002 годзе сярод раённых ЦБС Мінскай вобласці”.
2004г. – Дыплом пераможцы Рэспубліканскага агляда-конкурса “Бібліятэка – асяродак нацыянальнай культуры”.
2006г. – Дыплом Мінскай абласной бібліятэкі імя А.С.Пушкіна “Пераможца спаборніцтва на лепшую пастаноўку работы ў 2005 годзе сярод раённых ЦБС Мінскай вобласці”.
2006г. – Дыплом Мінскага абласнога выканаўчага камітэта “Аб прысуджэнні спецыяльнай прэміі года ў намінацыі “Бібліятэчная справа”.
2010г. – Ганаровая грамата Прэзідыума Мінскага гарадскога камітэта Беларускага прафсаюза рботнікаў культуры за значны ўклад у інтэлектуальнае, духоўнае і эстэтычнае ўзбагачэнне насельніцтва, надзейнае сацыяльнае партнёрства, умацаванне прафсаюзнага руху.
2015г. – Падзячнае пісьмо страшыні Сінадальнага аддзела рэлігійнай адукацыі і катэхізацыі Беларускай праваслаўнай цэрквы епіскапа Барысаўскага і Мар’інагорскага Веніаміна за ўдзел у І рэспубліканскім конкурсе “Библиотека – центр духовно-нравственного просвещения и воспитания” і значны ўклад ў духоўнае адраджэнне сучаснага грамадства.
2012г. – пераможца спаборніцтва сярод устаноў культуры Мядзельскога раёна на лепшую пастаноўку работы па развіццю культуры па выніках работы за 2012 год
2016г. – Баярская сельская бібліятэка-дом вольнага часу Дыплом 3 ступені ў XХVI Рэспубліканскім конкуреа “Бібліятэка – асяродак нацыянальнай культуры” у намінацыі “За значны ўклад у выхаваўчую работу з падрастаючым пакаленнем”.
Сёння раённая бібліятэка імя М.Танка адна са старэйшых і буйнейшых бібліятэк раёна, якая заўсёды імкнецца ісці ў нагу з часам і знаходзіцца ў пастаянным творчым пошуку.
У розныя гады кіраўнікамі бібліятэкі працавалі:
28.02.1949 | Шурпялёва Ганна Дзмітрыеўна |
01.03.1949 – 19.02.1950 | Магуцкая Мальвіна Францаўна |
19.02.1950 – 15.01.1951 | Малышава Марыя Ягораўна |
16.01.1951 – 18.07.1952 | Сцяпанава Марыя Ануфрыеўна |
18.07.1952 – 14.08.1954 | Шашкіна Тамара Рыгораўна |
03.08.1954 – 01.10.1958 | Мікуліч Марыя Конанаўна |
01.10.1958 – 03.02.1965 | Навіцкая Лія Аляксандраўна |
03.02.1965 – 17.05.1971 | Місуна Елізавета Станіславаўна |
17.05.1971 – 26.06.1973 | Жаўрыд Тамара Кірылаўна |
09.10.1973 – 07.12.1977 | Звяруга Галіна Адамаўна |
07.12.1977 – 05.12.1978 | Цыркулеўская Леакадзія Уладзіміраўна
|
06.12.1978 – 10.11.2014 | Несцяровіч (Цыркулеўская) Лекадзія Уладзіміраўна, дырэктар раённай цэнтралізаванай бібліятэчнай сістэмы |
11.11.2014 | Нырцова Таццяна Ананьеўна |
Храналогія падзей
1843 г. | пачала працаваць бібліятэка пры двукласным вучылішчы |
Пачатак ХХ ст | у двух пакоях памяшкання валаснога Савета размяшчаецца бібліятэка |
30-ыя гады ХХ ст. | пры Польшчы бібліятэка на грамадскіх пачатках размяшчаецца ў святліцы |
Верасень 1939 г. | кнігі з валасной бібліятэкі спалены, бібліятэка перастае існаваць |
Вясна 1940 г. | пачынае працаваць раённая бібліятэка |
Чэрвень 1941 г. | Мядзел акупіраваны войскамі фашысцкай Германіі. Фонд раённай бібліятэкі часткова спалены немцамі, разрабаваны |
Ліпень 1944- 1946 гг. | пасля вызвалення Мядзела сярод моладзі і камсамольцаў аб’яўлены рух па збору літаратуры для бібліятэкі |
Май 1945 г. | створаны раенны аддзел культуры |
1947 г. | адраджаецца раённая бібліятэка, размяшчаецца па вул. Крупскай |
Пачатак 50-х г. | бібліятэка пераязджае ў будынак райкама камсамола (вул. Савецкая, 6) |
12 жніўня 1951 г. | адкрываецца раённая дзіцячая бібліятэка (вул.Савецкая, 6) |
15 сакавіка 1978 г. | выканкам раённага Савета народных дэпутатаў прымае рашэнне “Аб цэнтралізацыіі сеткі дзяржаўных масавых бібліятэк раёна” |
5 снежня 1978 г. | усе дзяржаўныя масавыя бібліятэкі раёна аб’яднаны ў цэнтралізаваную бібліятэчную сістэму. Раённая бібліятэка рэарганізавана ў цэнтральную раённую бібліятэку |
6 снежня 1978 г. | загадам па раённаму аддзелу культуры №107а першым дырэктарам раённай цэнтралізаванай бібліятэчнай сістэмы прызначана Цыркулеўская Леакадзія Уладзіміраўна |
1982 г. | цэнтральная раённая і раённая дзіцячая бібліятэкі атрымалі спецыяльна пабудаванае памяшканне па вул.Шаранговіча,1 |
10 кастрычніка 1995 г. | указам Прэзідэнта Рэспублікі Беларусь А.Р.Лукашэнкі Мядзельскай цэнтральнай раённай бібліятэцы прысвоена імя Максіма Танка |
1999 г. | набываюцца камп’ютары, пачынаецца аўтаматызацыя асноўных бібліятэчных працэсаў |
2002 г. | ствараецца публічны цэнтр прававой інфармацыі |
2003 г. | пачынаецца камплектаванне дакументамі на электронных носьбітах |
2008 г. | абслугоўванне чытачоў чытальнай залы ажыццяўляецца ў аўтаматызаваным рэжыме |
2009 г. | абслугоўванне чытачоў абанемента ажыццяўляецца ў аўтаматызаваным рэжыме |
2009 г. | ствараецца невялікая музейная экспазіцыя “З гісторыі бібліятэкі” |
люты 2011 г. | пачала працаваць аўтабібліятэка |
2012 г. | па выніках работы за 2012 год калектыў бібліятэкі прызнаны пераможцам спаборніцтва сярод устаноў культуры раёна |
2013 г. | ствараюцца комплексныя ўстановы культуры – бібліятэкі-клубы, бібліятэкі-дамы вольнага часу |
2014 г. | устаноўлена новая версія праграмы ALIS-WEB |
2017 г. | праведзена інтэграцыя школьных бібліятэк з бібліятэкамі аграгарадкоў: Будслаў, Княгінін, Сваткі, Слабада, Старлыгі і Старыя Габы. |
01.04.2018 г. | створана дзяржаўная ўстанова “Мядзельская цэнтральная раённая бібліятэка імя Максіма Танка” |
2019 г. | зроблены рамонт аддзела абслуговання і інфармацыі цэнтральнай раённай бібліятэкі ім.М.Танка. Набыта новая мэбля для аддзела. Для зручнасці чытачоў чытальная зала перанесена з 4 паверха на 3. |
2021 г. | з абласнога бюджэту выдзелена 25 тысяч рублёў на набыццё мэблі для раённай дзіцячай бібліятэкі |